عزيزه النفس

نفسي عزيزه مقبل النفس تنهان
يالعنبوا نفسٍ رضت بالمهانه

أن كان وصلي لك بقله ونقصان
أنااعتبر نفسي بحقي مدانه

ما ينحني راسي واوطيه لانسان
ولا تشرفني حياتٍ جبـانه

لا ماتعودت انحني يوم وانهـــان
الانحنا والذل ساس الخيانه

والله لو تنشف بحورٍ وخلجان
او تصبح البيدا على شكل دانه

في كفتي والا على شكل فنجان
مارضى ولا اقبل كسر تلك المكانه

وش قيمتي لاسرت مفلس وطفران
وارخص لمن حتى رخص في زمانه

ان كان ظنك بي كذا فانت غلطان
وانت الغلط في كل شرع وديان

غلطان من قلت اعشقك والف غلطان
الادمي يوقع بزلت لسانه

وانا اعتبرها واعترف زلة السان
زلة مراهق واعتبرها شطانه

اعلنتها ماني على شي ندمان
ماظن في جرح الكرامه ليانه

الورد يذبل لانجرح عود الاغصان
والعطر ينشف في مرابع جنانه

لانسد شريان الغلا والغلا هان
يظمى ويفقد فى المحبه حنان

ويصبح البستان للحزن عنوان
اجرد وخالي مثل فاقد بنانه

حتى الفراش اللي تباها بالالوان
تموت فوق الغصن والاقحوانه