اجمل ما قيل بالحكمة

حطيت مثل الناس في الجيب جوال **** شي جديد وكل شي له بدايــة
يضمن وصول أخبار بالتو والحال **** لكن ما يضمن صحيح الروايـة
ما كل ما يسمع من الناس ينقــال **** أكثر كلام الناس مثل الدعايـة
تعرض بضاعتها بزينات وأشكال **** ويطيح فيها المشتري في النهاية
تسمع ولا تسلم من القيل والقــال **** لو قلت كلمة صوروها حكاية
السر خله من وراء سبعة أقفــال **** راقب مفاتيح الضمير بعناية
ما كنت افرق بين طيب وبطـال **** حتى جمعت من التجارب كفاية
ورتني الأيام في كل رجـــال **** علامة ماتكتشفها المرايــــة
ورتني الأيام في الناس عقــال **** ما تنخدع باهل الفتن والوشاية
ورتني الايام في الناس جهــال **** دار الزمان ولا لهم به درايـة
ولقيت في الدنيا تجاريب و امثال **** ميزت فيها صاحبي من عدايـة
ولقيت بعض الناس صاحب وختال **** يضحك معي ويسبني في قفاية
ولقيت بعض الناس للهرج نقــال **** تلقاه نقل الهرج عنده هوايــة
بعض العرب شيطان في ثوب وعقال **** ما كل شيطان دواه القرايــة
هذا دواه البعد لو عشت رحـــال **** حيث الردي فرقاه غاية مناية
دار بها يمشي الفتى خالي الــبال **** ودي بها لو كان ما القا عشاية
وان كان مال الوقت والوقت ميـال **** اصبر على جرحي وادور دواية
اشيل همي في ضميري ولو طـال **** وارجاي في اللي ما يخيب رجاية
رب الكريم يبدل الحال بالحــال **** ويطيب جرحي من خلاي بخلاية
اليا زبنت ازبن على طيب الــفال **** اللي يهلي يوم يسمع ندايـة
هذه القصيده للشاعر نضا ل بشاعر الحكمه اعجبتني وحبيت اشارك بها في المنتدى